ابنك حديده ( منقول)

من بلاد العقال والشال والريال أبو خلخال أهديكى أشواقي وقبلاتي ... يا ست الحبايب وحشتينى ، ووحشنى مصر وأهلها ووحشنى نيلها وزرعها

كل سنه وأنتي طيبه يا أمي وكل عيد أم وأنتي بخير وربنا يبعد عنك قوانين المرور ويحميكى من أنفلونزا الطيور ويرزقك بفلوس الضريبه العقاريه ويحافظلك على الماهيه

ويرزقك يا حبيبتي الصحه والسعاده وحسن العباده ورضا المسئولين الغلابه

أوعى يا أما تكوني بتطلعي فى المظاهرات ولا تكوني في الاعتصامات وأياكى والسياسه او انك ترغى عن الوعود البكاشه وبلاش تحكى عن الغلاء والأسعار والجار اللي بيبيع الجار

وقولي لأبويا كل سنه وهو طيب وخليه فى حاله ويربى عياله وبلاش نشرات الأخبار ولا حكاوي عن أخونا الشطار اللي بيدخلوا كل دار وأسهل حاجه عندهم ضرب النار

وقولي لإخواتى بلاش كلام عن العيش المدعوم ولا عن المواطن المطحون وبلاش رغى عن بطاقة التموين السحريه والدعم اللى بقى قضيه وبلاش نجيب في سيرة الناس لا طلعت ولا سوزان ولا السكرى المحتاس وبلاش كمان كلام على البوشى الحمد لله مسرقش فلوسى

بس مفيش مانع تدعى على ممدوح اللى كان فاكر هيطلع منها بكام لحلوح ومتنسيش معاه الفاسدين والمرتشين والمحتكرين والمهلبتيه القادرين

ومتنسيش يا أما تدعيلي أحسن الحال بقى غير الحال والشغل بقى على اد الحال والعيشه بقت صعبه والرزق بقى قليل والخير قرر يجافينا ويطير

بس طبعا بلدنا اخر حلاوه وحكومتنا ولا البقلاوه بيقولوا يا أما الجنيه عملوه زى الشلن وبقيتوا بتقبضوا صره من الدنانير والخير بتاع زمان رجع وهتشيلوا الفلوس فى قفه

وبيقولوا كمان ان فيزة شرم بقت سهلة وان المصريين دلوقتى ممكن يدخلوا الغردقه بالبطاقه بس زعلت اوى ان مارينا مبقاش يروحها غير مليون ونص بس !!!!!!!!! فين ايام زمان

كان نفسى يا غاليه اهاديكى هدية تليق بيكى لكن الله يجازيها امريكا خربت البيوت وسرقت القوت وسحبت العالم لطريق مسدود .

بس انتى زى اسمك حميده ودايما راضيه وعزيزه وعمرك ما هتزعلى من ........

ابنك حديده
(منقول)